SHAIRI: NGOJA NGOJA

Standard

IMG-20170730-WA0017.jpg

Ngoja ngoja, yaumiza matumbo

Leta vioja, upigwe kikumbo

Legeza mapaja, uachwe kitambo

Kama huna haja, tupa uone mambo.

 

Chelewa chelewa, mwana si wako

Lala ukilewa, tukutoboe mifuko

Lalama waonewa, usitende, mwiko

Kama hujalewa, hii ngoma si yako.

 

Haraka haraka, haina baraka

Haya alotamka, mvivu hakika!

Kitaka baraka, zitumikie kaka

Kuzifaidi fanaka, kwanza henyeka.

 

Polepole ndio mwendo

Chonde chonde huo so mwendo

Ole ole tatupwa kando

Sie chururu, we ndo ndo ndo!

 

Chembe na chembe huwa mkate

Kitaka utambe taabu ikupate

Kulifaidi sembe shambani upite

Utalipa ng’ombe kabla ya fungate.

 

Uvivu, huleta maumivu

Tamu ya uzembe njaa ikukumbe

Fanya kazi ambaa ubazazi

Omba dua pia chomwa jua.

 

© Paul Mndima

Limetungwa July , 2017

Limetolewa July 31, 2017

Advertisements