SHAIRI: Mama Sele na Mama Hamisi

Standard

Mama Sele na Mama Hamisi

 

Yalaaaa!

Mama Sele na Mama Hamisi wanasutana.

Majirani hatulali, kukuru kakara wanatukana.

Mtumee!

 

Ingefaa ningehama mtaa, laa ya urithi nyumba nayokaa.

Sasa karibuni sita saa, tititi usiku kiza totoro,

Hapana hata dalili, wajadi hawa kuesha mgogoro.

Kisa si kisa, visa visa tu kuzua mikasa,

Wake wa mume mmoja mabibi wa Mzee Kipara,

Washona dela moja wagombea majora,

Wasuka mkeka mmoja  kuti wagombea kulipara,

Domo walisha moja, ya nini kugombea mitonge?

Wacha mie nijikune kipara,

Tu nitizame ugomvi wa mafara.

© Paul Mndima

Limeandikwa , Mei 2, 2017  

Limetolewa Septemba 25 2017

Advertisements

SHAIRI:DUNIA KICHAA

Standard

dunia kichaa 3

Kwenye hii dunia kichaa

Tunaishi na watu, tunaishi na wanyama.

Sio wa porini tu, hata wale yunaowaita baba na mama.

Tofauti, sio maumbile yao, tabia zao na mienendo yao,

Kwa jinsi ya kuumbwa twafanana nao,

Ila utu ndio tofauti kati ya sisi na wao.

 

Kwenye hii dunia kichaa,

Wapo miungu,

Nikisema miungu sina maana

Ya wale tunao waabudu,

Hasha

Bali wale wanaoamua juu ya maisha ya wengine.

Wakisema washa, inawaka, zima inazimwa

Hao wanaamua nani afike kesho nani aishie leo

 

Kwenye hii dunia kichaa

Tunapigana, tunabishana tunauana

Kisa?

Miungu, dini na manabii tusiowajua,

Tunasikia hadithi tu na bwajaja za majukwaa.

 

Kwenye hii dunia kichaa

Kaka anavaa kama dada

Dada anavaa kama kaka

Kaka kawa kaka poa

Dada kawa dada poa

Ukikuta wamejipodoa

Hujui nani ni nani

Yoyote unaeza opoa.

 

Kwenye hii dunia kichaa,

Giningi si giningi

Mambo ngijinginji hakuna misingi

Shaghalabaghala,

Akisema hatupingi

Bi. Kirembwe kavua shungi

Kavalia suti

Fimbo yake shilingi

Masikhara hana

Kukutoboa havungi

Wasemavyo wenyewe,

Yu avuta mibangi

 

Kwenye hii dunia kichaa,

Zipo sehemu

Za watu fulani

Na za watu fulani fulani.

Ambapo, watu fulani hawastahili kufika kwa watu fulani fulani

Lakini akina fulani fulani

Wanaweza kuwabwakura akina fulani

Mahali fulani palipo pao!

Ujahili mtupu.

 

Kwenye hii dunia kichaa,

Tunapimwa uzito.

Lakini kuna mizani za akina fulani fulani

Na akina fulani nao wana yao mizani

Huku uzani unasema ratili ni vibaba fulani

Huku vibaba fulani

Hivyo wapo wenye vitambi

Na tupo matambitambi.

 

Kwenye hii dunia kichaa,

Kuna maisha,

Lakini si ya wote kuishi,

Wapo wanaoishi

Tupo tunokula matapishi

Ya wale wanaoishi

Na sie hatuna hata ubishi

Wale wakisema sisi hatubishi.

Yafaa nini basi kuishi

Kwenye hii dunia kichaa.

 

©Paul Mndima

Limetungwa: ‎Julai 18, ‎2017

 

 

SHAIRI: FUMBO

Standard

fumbo

Fumbo fumbo,

Fumbua!

Fumbo mfumbie mjinga,

Mwerevu nitakuumbua.

 

Fuga mbwa, mpake rangi ya sungura,

Mfunge na mnyororo wa dhahabu,

Hutufichi babu.

Atataka nyama tu.

Atabweka tu babu.

 

Fumbo fumbo,

Fumbua!

 

Fuga nyani,

Mpake na wanja, na mpodoe podoe,

Mvishe na gauni la zambarau,

Wamdanganya nani babu?

Atataka ndizi tu.

Babuuu! Atapandia miti tu babu

 

Fumbo fumbo,

Fumbua!

 

Jenga nyumba,

Paka na rangi za kifalme,

Weka na samani za thamani,

Wacha kujipa ujinga babu,

Nyumbani watu babu.

Itakuwa nyumba tu,

Huwezi kupaita nyumbani katu.

 

Fumbo fumbo,

Fumbua!

 

Soma babu,

Soma sana babu.

Weka na madigirii na maporofesa babu,

Pita hutuamkii jidai ringa babu,

Ila kama haikusaidii,

Elimu ya nini babu?

Elimu ukombozi babu.

 

Fumbo fumbo,

Fumbua!

 

Mwambie utamuoa babu,

Tangaza na ndoa babu,

Hakikisha unachojoa babu,

Mpeleke maskani babu,

Hakikisha unatoboa babu,

Ukishakojoa babu, mahari ya nini kutoa babu?

Nenda tu kawinde kwengine babu.

 

Fumbo bwana eeh!

Fumbo mfumbie mjinga babu,

Mwerevu nitakuumbua babu.

 

Fumbo fumbo,

Fumbua!

 

Mwaga hela mwaga sera babu,

Zimiminie zimiminike tupatie zitushike babu,

Machozi tumiminie,

Tizi tupigie babu,

Ahadi tutambishie babu,

Hila zako tulainishie babu.

Ukishafika juu babu, huku we tunyee tu babu,

Kwani sie watu babu?

 

Fumbo mfumbie mjinga babu

Mwerevu ntakuumbua babu.

Eeeh bwana wee!

 

Fumbo fumbo,

Fumbua!

 

Piga kazi babu,

Sota sana babu,

Kaza buti babu,

Pigika henyeka babu,

Ikifika jioni babu, pigisha raundi babu,

Rudi nyumba ni mweupeeee,

Amina kakukuna kakupuna zote kachuna,

Kesho rudia tena babu.

 

Fumbo fumbo,

Fumbua!

 

Podoka mama podoka,

Weka wanja na midomo rangi paka,

Kikundi kina mama leo muhimu fika,

Kata kona kwa Rama mpemba,

Urudi nywele tim tim,

Na rangi zimefutika,

Jumamosi tena babu wee!

Fala kala kalala kalalama

Vya fala kala mzee Rama.

 

Hahahahaaa!

 

Fumbo fumbo,

Fumbua!

Fumbo mfumbie mjinga babu,

Mwerevu nitakuumbua babu.

 

©Paul Mndima

Limetungwa Agosti 26, 2017

SHAIRI: BWANA AMETWAA

Standard

Image result for goes around comes around

BWANA AMETWAA

Ulianza muwasho, tukakuna.

Kikawa kipele, tukaminya.

Hakikupasuka.

Kikawa jipu, tukatumbua.

Likawa donda, donda likawa ndugu.

Sasa umeoza, tunakata mguu.

 

Alidokoa, akaonja

Akanogewa,

Akaiba kwa kijiko, akala, akanogewa.

Akaiba kwa kikombe, akala, akanogewa.

Akaiba mzinga kabisa,

Na nyuki wake.

Manundu wamemuumua,

Hafai hali yake.

 

Aliona,

Akatamani, akamkonyeza

Akachekewa, akaendeleza,

Akamshika, akakubali,

Akambusu, akakubali

Akaomba, akapewa

Akafaudu,

Leo kilo mbili kafukiwa.

 

Bwana ametoa,

Bwana ametwaa,

Jina la bwana lihimidiwe.

 

© Paul Mndima

August 26, 2017

SHAIRI: JUMA AU JONI?

Standard

Juma au Joni?

juma au joni.jpg

Si myahudi, si myunani
Ni mwafrika, wa hapa nyumbani
Joni au Juma, huyu tumwite nani?

Baba mchaga, mama mdigo wa tanga,
Matata bwana wachaga, mama jina keshapanga
Joni au Juma, huyu tumwite nani?

*******

Aitwe Juma huyu, mamaye amfuate,
Hakuokotwa kwa mbuyu, mama alilala matenite,
Juma huyu aitwe, Joni aitwe nani?

Miezi kenda rudi nenda, mama kabeba kwa kupenda,
Kamleta kwa kilio, kavumilia mengi na kushinda,
Juma huyu aitwe, Joni aitwe nani?

Nini basi umpatiye, kama si faraja hii kuu,
Ampe jina mwanaye, ajifanyie na sikukuu,
Juma huyu aitwe, Joni aitwe nani?

********

Baba mie Paulo, kama mtume yule wa kale,
La baba mwana na roho, mwana wa kwanza yangu roho,
Joni huyu aitwe, Juma umwite nani?

Kwetu familia, twafuata kwa baba zetu,
Jina, dini ya kusalia, haturithi kwa mama zetu,
Joni huyu aitwe, Juma umuite nani?

Baba kauli natoa, nashikilia yangu asilia,
Mwanamke kwenye ndoa, afuate ya bwana ndio ajua,
Joni huyu aitwe, Juma umuite nani?

Mwanaume mjadala nafunga, Joni mtoto tamuita,
Mwanamke ndoa keshafunga, wake wa pili tamuita
Joni huyu aitwe, Juma umuite nani?

*******
Mwabwabwaja, mwaamba nini?
Nyie wote weusi tititi, majina ya kizungu yanini?
Wote nywele kipilipili, majina ya arabu ya nini?

Mwapigana, mwapigania nini?
Asili yenu mizimu, mwashindania vya kuletwa, mna wazimu?
Wote wabantu, mna vichaa nyie watu?

Massawe, mponda
Mwataka mwana Juma na Joni,
halafu muje mlie jioni,
Asili inapotea, eti uafrika unapotea.

Yako wapi Mareale, Mutashobya na Mushi?
Mwalilia majina ya wa kule,
Nyumbani mlimani Moshi,
Kwenu kutambika mbege na masale,
Kuku na mchele arabia hakuna

Babu zenu mwatia aibu, kwa kutenda ajabu,
Kofia, kanzu hijabu, kwa meli vililetwa isiwe tabu,
Zetu asili mwaziacha aibu, amkeni mara mkatubu.

Limetungwa Januari ‎4, ‎2017 na kuhaririwa ‎Juni ‎6, ‎2017

Limetolewa Agosti 28, 2017.

Picha na: cdn.theconversation.com

RAHA

Standard

raha.jpg

Raha ya utungo kina,

Raha ya ndoa mwana,

Raha ya mwasho kuna,

Raha yangu kupendwa naye.

 

Raha ya shamba kuvuna,

Raha buzi kuchuna,

Raha ya kumkosa hakuna,

Raha yangu kuwa nae.

 

Utamu wa bungo lichachuke,

Utamu wa bongo uzishike,

Utamu wa ngoma idundike,

Utamu wa penzi kupendwa nae.

 

Kizuri kidole kipe pete,

Kizuri kiuno kipepete,

Kizuri kitamu kisikupite,

Kizuri na chema si bali yeye.

 

Faraja ya ndoa malewano,

Faraja iso doa haina mfano,

Faraja ya mambo yawe mswano,

Faraja yangu anipende yeye.

 

Pendo si pendo kama si la dhati,

Pendo si pendo tukivutana mashati,

Pendo si pendo kama la masharti,

Pendo si pendo kama sijapendwa naye.

 

Maisha ishi ukipendwa,

Maisha yesha ukitendwa,

Maisha mema ukifundwa,

Maisha sina akienda.

 

Sifa sio kama si njema,

Sifa ndio haitiliwi lazima,

Sifa hiyo ipi iso ya huyu mama,

Sifaze hazeshi wacha nirejee ngama.

© Paul Mndima, May 2017

SHAIRI: NGOJA NGOJA

Standard

IMG-20170730-WA0017.jpg

Ngoja ngoja, yaumiza matumbo

Leta vioja, upigwe kikumbo

Legeza mapaja, uachwe kitambo

Kama huna haja, tupa uone mambo.

 

Chelewa chelewa, mwana si wako

Lala ukilewa, tukutoboe mifuko

Lalama waonewa, usitende, mwiko

Kama hujalewa, hii ngoma si yako.

 

Haraka haraka, haina baraka

Haya alotamka, mvivu hakika!

Kitaka baraka, zitumikie kaka

Kuzifaidi fanaka, kwanza henyeka.

 

Polepole ndio mwendo

Chonde chonde huo so mwendo

Ole ole tatupwa kando

Sie chururu, we ndo ndo ndo!

 

Chembe na chembe huwa mkate

Kitaka utambe taabu ikupate

Kulifaidi sembe shambani upite

Utalipa ng’ombe kabla ya fungate.

 

Uvivu, huleta maumivu

Tamu ya uzembe njaa ikukumbe

Fanya kazi ambaa ubazazi

Omba dua pia chomwa jua.

 

© Paul Mndima

Limetungwa July , 2017

Limetolewa July 31, 2017